June 30, 2010

မီမဿဢ္ သ့ဢ္တဖဢ္မ့ဿ္ပွၯခရံာ္ဖိဧါ

တဿ္ထိဢ္သႀတီၯ ပဲာ္ထံနီၯဖး မီမဿဢ္ (မ့) ခရံာ္အတဿ္အိဢ္ဖွိဢ္ အပွၯစီဆွံ လဿမုဿ္နံၯခံကတဿဿ္ အတဿ္စူဿ္ တဿ္နာ္ဒီး ပွၯခရံာ္ဖိအတဿ္စူဿ္တဿ္နာ္



ဂႜိစဲးစမံး ပွၯလဿအဒုးကဲထီဢ္မီမဿဢ္ကရဿ


တဿ္ကတိၯလဿညါ


ခရံာ္အတဿ္အိဢ္ဖွိဢ္အပွၯစီဆွံလဿမုဿ္နံၯခံကတဿဿ္ အံၯ ဘဢ္တဿ္သ့ဢ္ညါအီၯလဿလံာ္မဲာ္ဖ်ဿဢ္ အဖုဢ္မ့ဿ္၀ဲ LDS န႔ဢ္လီၯ. ဘဢ္ဆဢ္ပွၯအါတက့ဿ္ ကိး၀ဲလဿမီမဿဢ္ အတဿ္အိဢ္ဖွိဢ္န႔ဢ္လီၯ. ဘဢ္တဿ္စးထီဢ္ဒုး အိဢ္ ထီဢ္အီၯဖဲ ၁၈၃၀ နံဢ္ လဿပွၯအမဲရကၯဖိလဿအမံၯမ့ဿ္ ဂႜိစဲး စမံး လဿအ၀ဲၯလီဿ္ခိဢ္သ့ဢ္အိဢ္ဖဲ စီးလ့း အ၀့ဿ္ ဖဲယူဿ္ထဢ္ ကီဿ္စဲဢ္အပူၯန႔ဢ္လီၯ. တုၯဃီၯဖဲ ၂၀၀၀ နံဢ္န႔ဢ္ မီမဿဢ္ အနီဢ္ဂံဿ္အိဢ္၀ဲ ၁၁ ကလီဿ္ လဿထံကီဿ္ ၁၆၂ ဘ့ဢ္ ဃုာ္ဒီး ၅.၁ ကလီဿ္ လဿကီဿ္စဲဢ္အဘ့ဢ္ ၅၀ အပူၯ ဖဲကီဿ္အမဲရကၯ န႔ဢ္လီၯ.

အါဒဢ္တဿ္တက့ဿ္မီမဿဢ္တဖဢ္အံၯ စံးလီၯအသးလဿအမ့ဿ္ခရံာ္ဖိ မ့ဿ္လဿအစူဿ္အနာ္ယြၯဒီးခရံာ္ န႔ဢ္လီၯ. ဘဢ္ဆဢ္ ပမ့ဿ္တဲလဿအဖုဢ္န႔ဢ္ မီမဿဢ္တဖဢ္အံၯ မ့ဿ္ထံဖိကီဿ္ဖိလဿအဂ့ၯ အိဢ္ဒီးတဿ္သူဢ္ဆူဢ္သးဂဲၯလဿ တဿ္တိစဿၯမၯစဿၯပွၯဂၯ၊ ဒီးအိဢ္ဒီးတဿ္ပာ္သးလဿအထီလဿနီဿ္သး တဿ္စူဿ္တဿ္နာ္န႔ဢ္လီၯ. လဿတဿ္န႔ဢ္ အဃိ ပွၯသ့ဢ္တဖဢ္အံၯ ဖ်ါလီၯဂာ္ဒ္အမ့ဿ္ပွၯဂ့ၯဘဢ္ဆဢ္ မ့ဿ္အ၀ဲသ့ဢ္မ့ဿ္ခရံာ္ဖိဧါ.

မီမဿဢ္ကရဿအံၯဆွဿပွၯသးစဿ္လဿ ကစိာ္တဿ္သးခုကစီဢ္အါမးန႔ဢ္လီၯ. ပွၯစိာ္တဿ္သးခုကစီဢ္သးစဿ္ တဖဢ္အံၯ ထီဘိကူသိး၀ဲဆ့ကၯ၀ါ ဒီးကိာ္စဿ ဒီးဒိး၀ဲလ့ဢ္ယီဿ္တဖဢ္န႔ဢ္လီၯ. အ၀ဲသ့ဢ္ကကတိၯတဿ္ဒီးနၯ မုာ္၀ဲဘဢ္ဆဢ္ တဿ္လဿပကဘဢ္ပလီဿ္ပသးတခီ မီမဿဢ္ အတဿ္စူဿ္တဿ္နာ္ဒီး ခရံာ္ဖိအတဿ္စူဿ္တဿ္နာ္န႔ဢ္ လီၯဆီလိာ္အသးလီၯ.

တဿ္စူဿ္တဿ္နာ္ဘဢ္ဃးလံာ္စီဆွံ

မီမဿဢ္ကရဿအံၯ နာ္၀ဲလဿဂႜိစဲး စမံး န႔ဢ္ကလူးလဿမူခိဢ္ဟဲအိဢ္သကိးအီၯ ဒီးတဲအီၯလဿကဘဢ္ဒုးအိဢ္ ထီဢ္တဿ္အိဢ္ဖွိဢ္ လဿအမ့ဿ္အတီန႔ဢ္လီၯ. စမံး နာ္၀ဲလဿ တဿ္တဲအီၯလဿ ခရံာ္ဖိတဿ္အိဢ္ဖွိဢ္္လဿမုဿ္ မဆါ တနံၯအံၯတဖဢ္ နာ္တဿ္ကမဢ္၀ဲန႔ဢ္လီၯ. King James လံာ္စီဆွံအံၯ မီမဿဢ္တဖဢ္မ့ဿ္တူဿ္လိာ္၀ဲလဿ အ၀ဲသ့ဢ္အလံာ္လြံဿ္ဘ့ဢ္အက်ါတဘ့ဢ္ဘဢ္ဆဢ္ ဂႜိစဲးစမံးစံး၀ဲလဿ လံာ္စီဆွံအံၯအိဢ္ထဲတဿ္ကမူၯကမဢ္ ဒီးတဿ္တကြဲးက်ိာ္ထံအီၯဘဢ္ဘ်ီးဘဢ္ဒါဘဢ္. လဿအ၀ဲအတဿ္ကြဲးအပူၯန႔ဢ္ ဂႜိစဲးစမံး ကြဲးဖဿႏုာ္၀ဲတဿ္ဂ့ဿ္ အဘီလဿအကယၯ လဿအ၀ဲဆိကမိဢ္လဿအမ့ဿ္ အဘွီဘဢ္က့ၯတဿ္လဿလံာ္စီဆွံအပူၯန႔ဢ္လီၯ.

ဖဲ ၁၈၂၃ နံဢ္ ဂႜိစဲးစမံးစံး၀ဲလဿ ကလူးလဿအမံၯမိရိၯနံ (Moroni) ဟဲအိဢ္သကိးအီၯဒီး ဆွဿအီၯဆူလီခီ ထူလဿအအိဢ္ပွဲၯဒီးတဿ္သးခုကစီဢ္န႔ဢ္လီၯ. စမံးစံး၀ဲလဿ လီခီတဖဢ္အံၯ ဘဢ္တဿ္ကြဲးပာ္လီၯတ့ဿ္လံအီၯ လဿပွၯအဲးကူပတူးဖိတဖဢ္အတဿ္ကြဲးအပနီဢ္တဖဢ္ ဒီးမ့ဿ္တဿ္တခါလဿစမံးကြဲးက်ိာ္ထံက့ၯ၀ဲ သ့လီၯလိဿ္ လီၯလးန႔ဢ္လီၯ. လဿတဿ္ဂ့ဿ္ခဲလဿာ္အဖီခိဢ္ စမံးပာ္ဖ်ါထီဢ္စ့ဿ္ကီး၀ဲလဿ လီခီအံၯဘဢ္ဃးဒီးလံာ္စီဆွံ အပူၯ တဿ္ဂ့ဿ္အကါဒိဢ္လဿအအိဢ္လီၯတဲာ္တနီၯန႔ဢ္လီၯ. တဿ္ကြဲးလဿစမံးကြဲးက်ိာ္ထံက့ၯလဿလီခီထူ အံၯအပူၯတဖဢ္န႔ဢ္ ကဲထီဢ္က့ၯမီမဿဢ္ အလံာ္ဒီး ယုဿ္ပိာ္ထြဲန႔ဢ္အမံၯလဿ ကလူးမိရိၯနံ အပဿ္န႔ဢ္လီၯ.

မီမဿဢ္နာ္၀ဲလဿ ပွၯအခိဢ္က်ဿဿ္မ့တမ့ဿ္ ၀ံလဿမီမဿဢ္ အတဿ္အိဢ္ဖွိဢ္အံၯ မ့ဿ္ဒဢ္ထဲပွၯတဲတဿ္ပဿတဂၯဧိၯ လဿယြၯအဂီဿ္န႔ဢ္လီၯ. ဂႜိစဲးစမံး မ့ဿ္ကလူးအဆိကတဿဿ္တဂၯန႔ဢ္လီၯ. လဿနံဢ္တဘ်ဳးနံဢ္အတီဿ္ပူၯ ပွၯလဿအမ့ဿ္ပွၯတီခိဢ္ရိၯမဲခိဢ္က်ဿဿ္တဖဢ္ ဒီး၀ံတဖဢ္ အတဿ္ကတိၯမ့ဿ္ ဒ္ယြၯအတဿ္ကတိၯအသိးလီၯ.

တဿ္စူဿ္တဿ္နာ္အံၯမ့ဿ္တဿ္လဿအလီၯဆီ ဒိဢ္မးဒီးခရံာ္ဖိအတဿ္စူဿ္တဿ္နာ္န႔ဢ္လီၯ. ပွၯခရံာ္ဖိအလံာ္စီဆွံ ဘဢ္တဿ္ဒုးအိဢ္ထီဢ္အီၯလဿခရံာ္ဖိခိဢ္နဿ္လဿပ်ဿၯတဖဢ္ လဿအကြဿ္ကဒါက့ၯတဿ္ကြဲးတဖဢ္ လဿတဿ္ ထံဢ္လိာ္အိဢ္ဖွိဢ္တဘ်ဳးဘ်ီအတီဿ္ပူၯန႔ဢ္လီၯ. လဿ ၃၉၃ နံဢ္လံၯလံၯ လံာ္စီဆွံအံၯအိဢ္၀ဲအလီဿ္လီဿ္လဿ တဘဢ္တဿ္ဆီတလဲအီၯဘဢ္. ဖဲဆဿကတီဿ္ဖဲန႔ဢ္တဿ္ဆဿတဲာ္လဿ လံာ္စီဆွံအလီဿ္လံၯတကၾတဴဿ္ အိဢ္၀ဲ ၃၉ ဘ့ဢ္ဒီးလံာ္စီဆွံအသီတကၾတဴဿ္ကမ့ဿ္ ၂၇ ဘ့ဢ္ ဒီးခဲလဿာ္ မ့ဿ္တဿ္ကြဲးအီၯလဿယြၯအသးစီဆွံ ဒီးမ့ဿ္ယြၯအတဿ္ကတိၯန႔ဢ္လီၯ. လဿတဿ္န႔ဢ္အဃိ လဿအပူၯကြံာ္ ၁၇၀၀ နံဢ္န႔ဢ္ ပွၯခရံာ္ဖိတဖဢ္တူဿ္ လိာ္အဿဢ္လီၯလဿ လံာ္စီဆွံအံၯမ့ဿ္ယြၯအစိအကမီၯဒီး မ့ဿ္ယြၯအတဿ္ကတိၯလီၯတံဿ္လီၯဆဲးဒီး လံာ္အ ဂုၯအဂၯတအိဢ္လဿတဿ္ကသူအီၯလဿ ပွၯခရံာ္ဖိတဿ္စူဿ္တဿ္နာ္မိဿ္ပွဿ္ခီဢ္ထံးအဂီဿ္ဘဢ္. ကြဿ္ဖဲ (၂ တံၯမသ့း ၃း၁၅-၁၇ ဒီး ၂ ပ့ဢ္တရူး ၁း၁၉-၂၁) လံာ္စီဆွံတဲဘဢ္ပွၯလဿယြၯအကလုဿ္ကထါကအိဢ္ ကဆိး လီၯထူလီၯယိာ္န႔ဢ္လီၯ. (၁ ပ့ဢ္တရူး ၁း၂၃-၂၅) မ့ဿ္လဿယြၯအကလုဿ္ကထါကအိဢ္ကဆိးလီၯ ထူလီၯယိာ္အဃိ အလီဿ္တအိဢ္လဿတဿ္ဆီတလဲအိဢ္ထီဢ္လဿလံာ္စီဆွံအပူၯဘဢ္. လဿတဿ္ဂ့ဿ္အံၯ အဖီ ခိဢ္ ၅ မိၯရွ့ ၄း၂ သိဢ္လိပွၯလဿ တဿ္ဆီတလဲလံာ္စီဆွံအတဿ္ကြဲးမ့ဿ္တဿ္လဿကမဢ္န႔ဢ္လီၯ.

တဿ္စူဿ္တဿ္နာ္ဘဢ္ဃးယြၯ

မီမဿဢ္နာ္၀ဲလဿ ယြၯန႔ဢ္စးထီဢ္အိဢ္ထီဢ္လဿဟီဢ္ခိဢ္ခ်ဿ ဒ္ပ၀ဲနၯယၯတဖဢ္အသိးန႔ဢ္လီၯ. ဘဢ္ထြဲဒီး မီမဿဢ္အတဿ္ဆိကမိဢ္အံၯန႔ဢ္ ယြၯပာ္လီၯ၀ဲအတဿ္လိဢ္ဘဢ္ ဒီး လဿခံကဲထီဢ္ဒ္ယြၯတဂၯအသိး ဒီးန႔ဿ္သါ ဘဢ္၀ဲမူခိဢ္န႔ဢ္လီၯ. အ၀ဲမ့မ့ဿ္ယြၯသနာ္က့ အ၀ဲအိဢ္ဒီးအနီဿ္ခိ အဖံးအညဢ္ဒီးအဃံ တဖဢ္န႔ဢ္လီၯ. မီမဿဢ္ ဆိကမိဢ္၀ဲလဿ ယြၯလဿအသ့တဿ္လဿာ္ ဒ္အံၯတဖဢ္ခဲလဿာ္ စးထီဢ္အသးဒ္ပွၯမုဿ္ဆ့ဢ္မုဿ္ဂီၯဖိ အသိးဘဢ္ဆဢ္ ခဲအံၯတဂၯဒီးတဂၯအိဢ္ဒီးအကစဿ္ဒဢ္၀ဲအမူခိဢ္န႔ဢ္လီၯ. ဘဢ္ထြဲဒီးမီမဿဢ္ အတဿ္စူဿ္တဿ္ နာ္အံၯစံး၀ဲဒဢ္ ပကဲထီဢ္ဒ္ယြၯတဂၯအသိးသ့ ဃုာ္ဒီးပနီဿ္ကစဿ္အဟီဢ္ခိဢ္ဖ်ဿဢ္ဒဢ္၀ဲ ဘဢ္ဆဢ္ ပကဘဢ္ဒိ ကနဢ္မီမဿဢ္ တဿ္အိဢ္ဖွိဢ္တဿ္သိဢ္လိတဖဢ္န႔ဢ္လီၯ.

အါန႔ဿ္အန႔ဢ္ မီမဿဢ္နာ္၀ဲဒဢ္လဿ ပဿ္ကစဿ္လဿမူခိဢ္ သးစီဆွံဒီးကစဿ္ယ့ဢ္ရွဴးခရံာ္တဖဢ္ လီၯဆီလိာ္အသး ဒဢ္၀ဲဒ္ ယြၯလဿအလီၯဆီလိာ္အသးတဂၯဒီးတဂၯန႔ဢ္လီၯ. အ၀ဲသ့ဢ္တဖဢ္နာ္စ့ဿ္ကီး၀ဲလဿ ပဿ္ကစဿ္လဿ မူခိဢ္အံၯ ဒုးအါထီဢ္၀ဲနီဿ္သးဖိလံၯတဖဢ္ လဿမူခိဢ္ဘီမုဿ္အပူၯ လဿကဲထီဢ္၀ဲပွၯကညီလဿဟီဢ္ခိဢ္အံၯန႔ဢ္ လီၯ. လဿတဿ္န႔ဢ္အဃိ ပွၯဟီဢ္ခိဢ္ဖိခဲလဿာ္ ဃုာ္ဒီးကစဿ္ခရံာ္ဒီးမုဢ္ကီၯလံဿ္ ခဲလဿာ္မ့ဿ္ကစဿ္ယြၯအဖိ အလံၯန႔ဢ္လီၯ.

ပွၯခရံာ္ဖိအတဿ္နာ္အံၯ လီၯဆီဒီးမီမဿဢ္ အတဿ္နာ္ဒိဢ္မးန႔ဢ္လီၯ. ယိၯဟဢ္ ၄း၂၄ သိဢ္လိပွၯလဿ ယြၯန႔ဢ္ မ့ဿ္သး ဒီးတမ့ဿ္ဒ္နီဿ္တဂၯအသိး လဿအအိဢ္ဒီးအဖံးအညဢ္ဒီးအဃံတဖဢ္ဘဢ္. ပွၯခရံာ္ဖိတဖဢ္ နာ္စ့ဿ္ ကီး၀ဲလဿ ယြၯန႔ဢ္အိဢ္၀ဲလီၯထူလီၯယိာ္တဘိယူဿ္ဃီ ဒီးမ့ဿ္၀ဲယြၯထီဘိန႔ဢ္လီၯ. ဆီတလဲတသ့ဘဢ္. ပွၯကူပွၯကညီတဖဢ္ဘဢ္တဿ္တ့အီၯလဿယြၯ ဒီးအ၀ဲသ့ဢ္မ့ဿ္တူဿ္လိာ္ကစဿ္ခရံာ္ဒ္အမ့ဿ္တဿ္အုဢ္က့ၯ ခီဢ္က့ၯကစဿ္န႔ဢ္ ကဲထီဢ္ယြၯအဖိတဖဢ္န႔ဢ္လီၯ. ဘဢ္ဆဢ္ပွၯခရံာ္ဖိတဖဢ္တနာ္လဿ ပွၯကူပွၯကညီ အနီဿ္ကစဿ္ဒဢ္၀ဲ ကဲထီဢ္ဒ္ယြၯတဖဢ္အသိးတသ့ဘဢ္. ကြဿ္ဖဲ ၁ယိၯဟဢ္ ၁း၁၂-၁၃. ပွၯခရံာ္ဖိတဖဢ္နာ္ ၀ဲလဿ ယြၯသ့ဢ္ညါတဿ္ခဲလဿာ္ ဒီးတ့လီၯ၀ဲဟီဢ္ခိဢ္မူခိဢ္ ဒီးတဿ္လဿအအိဢ္ထီဢ္တမံၯလဿ္လဿ္ခဲလဿာ္ န႔ဢ္လီၯ. ပွၯခရံာ္ဖိတဖဢ္နာ္၀ဲလဿ ယြၯသ့ဢ္ညါတဿ္ခဲလဿာ္ ဒီးအိဢ္၀ဲလဿတဿ္လီဿ္ကိးပူၯဒဲး လဿဆဿက တီဿ္တကတီဿ္ဃီအပူၯန႔ဢ္လီၯ.

တဿ္စူဿ္တဿ္နာ္ဘဢ္ဃးဒီးခရံာ္

မီမဿဢ္နာ္၀ဲလဿ ပွၯခဲလဿာ္လဿဟီဢ္ခိဢ္အံၯ အဆိကတဿဿ္အိဢ္ထီဢ္၀ဲဒ္နီဿ္သးဖိသဢ္တဖဢ္အသိး၊ အိဢ္ဖ်ဲဢ္ ထီဢ္၀ဲလဿပဿ္ဒီးမိဿ္လဿမူခိဢ္န႔ဢ္လီၯ. မီမဿဢ္ဆိကမိဢ္၀ဲဒဢ္လဿ ယ့ဢ္ရွဴးမ့ဿ္ပ၀ဲဿ္အဒိဢ္ကတဿဿ္ မ့ဿ္လဿအ ၀ဲအိဢ္ဖ်ဲဢ္ထီဢ္အဆိကတဿဿ္လဿနီဿ္သးတကပၯန႔ဢ္လီၯ. ယ့ဢ္ရွဴးမ့ဿ္ပွၯထဲတဂၯဧိၯလဿ ဟီဢ္ခိဢ္အံၯအိဢ္ ဖ်ဲဢ္ထီဢ္လဿ တဿ္ရ့လိာ္ဘဢ္ထြဲ ပဿ္လဿမူခိဢ္ဒီးမိဿ္လဿဟီဢ္ခိဢ္ နီဿ္မၯရံ န႔ဢ္လီၯ. မီမဿဢ္နာ္စ့ဿ္ကီး၀ဲလဿ ယ့ဢ္ရွဴးသံလဿထူဢ္စုညါအလိၯ၀ံၯ အတဿ္ဂဲၯဆဿထဿဢ္သမူထီဢ္က့ၯန႔ဢ္ ကတဲာ္ကတီၯတဿ္မူလီၯထူလီၯ ယိာ္လဿပွၯကိးဂၯဒဲးအဂီဿ္န႔ဢ္လီၯ. ဒ္လဲဢ္ဂ့ၯဂ့ၯန႔ဢ္ ပွၯလဿအတူဿ္လိာ္ဒိကနဢ္တဿ္သိဢ္လိဘဢ္ဃး မီမဿဢ္ အတဿ္အိဢ္ဖွိဢ္အံၯ ကမၯန႔ဿ္ဘဢ္၀ဲလီဿ္ထီဢ္ထီလဿမူခိဢ္အဘီအမုဿ္အပူၯ ဃုာ္ဒီး နီဿ္ကစဿ္ကဲထီဢ္ ဒ္ယြၯအသိးန႔ဢ္လီၯ.

ပွၯခရံာ္ဖိတဖဢ္အိဢ္ဒီးအတဿ္ထံဢ္လီၯဆီဘဢ္ဃးယ့ဢ္ရွဴးခရံာ္န႔ဢ္လီၯ. ယိၯဟဢ္ ၁း၁-၁၈ တဲဘဢ္ပွၯဘဢ္ ဃးယ့ဢ္ရွဴးမ့ဿ္ပွၯလဿအအိဢ္တ့ဿ္လဿထံးလဿသီ၊ အိဢ္၀ဲဒီးယြၯ၊ ဒီးမ့ဿ္ယြၯလီၯ. ယ့ဢ္ရွဴးခရံာ္မ့ဿ္ပွၯလဿအ တ့လီၯတဿ္ခဲလဿာ္လဿဟီဢ္ခိဢ္အံၯလီၯ. ပွၯခရံာ္ဖိတဖဢ္နာ္၀ဲလဿ ယ့ဢ္ရွဴးမ့ဿ္တဿ္ဘဢ္ဃးဒီးယြၯသဿဂၯ တဂၯဃီ၊ လဿအပဢ္ဃုာ္ယြၯပဿ္ကစဿ္၊ ယ့ဢ္ရွဴးဖိခြါကစဿ္ ဒီးသးစီဆွံကစဿ္န႔ဢ္လီၯ. သဿဂၯမ့ဿ္တဂၯဃီ ဒီး မ့ဿ္ယြၯတဂၯဃီလီၯ.

ပွၯခရံာ္ဖိတဖဢ္နာ္၀ဲလဿ မုဢ္ကနီၯနီဿ္မၯရံ ဒိးန႔ဿ္ဘဢ္တဿ္လီၯလးခီဖ်ိလဿယြၯ ဒီးယ့ဢ္ရွဴးဟ့ဢ္လီၯကြံာ္ အလီဿ္အလၯလဿမူခိဢ္ ဟဲလီၯအိဢ္မူ၀ဲလဿဟီဢ္ခိဢ္အံၯန႔ဢ္လီၯ. ပွၯခရံာ္ဖိတဖဢ္နာ္၀ဲလဿခရံာ္မၯနဿၯ ကြံာ္တဿ္သံ ဖဲလဿအ၀ဲသံလဿထူဢ္စုညါအလိၯ ဒီးဂဲၯဆဿထဿဢ္သမူထီဢ္က့ၯလဿတဿ္သံန႔ဢ္လီၯ. ပွၯ တဿ္ဒဲးဘးဖိတဖဢ္အိဢ္သကိးဃုာ္ဒီးယြၯအပွၯစီဆွံအံၯတသ့ဘဢ္ (ရိမ့ၯ ၃း၂၃). မ့မ့ဿ္ပွၯလဿအနာ္ ယ့ဢ္ရွဴးလဿအမ့ဿ္ အတဿ္အုဢ္က့ၯခီဢ္က့ၯကစဿ္လဿအပွ႔ၯက့ၯပွၯလဿတဿ္သံ ခီဖ်ိလဿအသြံဢ္စီဆွံအဃိ ဒ္သိးပတဿ္ဒဲးဘးကဘဢ္တဿ္ပ်ဿ္ကြံာ္အဂီဿ္ န႔ဢ္မ့ဿ္က့ၯ၀ဲယြၯအဖိတဖဢ္န႔ဢ္လီၯ (ယိၯဟဢ္ ၁း၁၂၊ ယိၯဟဢ္ ၁၄း၆). ထဲဒဢ္ပွၯလဿအစူဿ္က့ၯနာ္က့ၯခရံာ္ဒ္အတဿ္အုဢ္က့ၯခီဢ္က့ၯကစဿ္အသိးတဖဢ္န႔ဢ္ ကလဲၯႏုာ္ဘဢ္၀ဲဆူမူခိဢ္အဘီအမုဿ္အပူၯန႔ဢ္လီၯ.

တဿ္ကတိၯလဿခံ

ပွၯအါဂၯလဿအအိဢ္လဿထံကီဿ္အါဘ့ဢ္တဖဢ္ ဆိမိဢ္၀ဲလဿ ကီဿ္အမဲရကၯမ့ဿ္ ခရံာ္ဖိအထံအ ကီဿ္န႔ဢ္လီၯ. ဘဢ္ဆဢ္ တဿ္စူဿ္တဿ္နာ္အိဢ္လီၯဆီလိာ္သးတဘ်ဳးမံၯလဿကီဿ္အမဲရကၯအပူၯ န႔ဢ္လီၯ. ပတဲဖ်ါတ့ဿ္လံဘဢ္ဃးမီမဿဢ္ အတဿ္စူဿ္တဿ္နာ္အတဿ္လီၯဆီဒီးပွၯခရံာ္ဖိအတဿ္စူဿ္ တဿ္နာ္လံန႔ဢ္လီၯ. နမ့မ့ဿ္တ့ဿ္လံခရံာ္ဖိဒီးဒ္နတဿ္နာ္အိဢ္အသိးလဲၯအီၯတုၯလီၯတီၯလီၯ တက့ဿ္. တဘဢ္ကဒံကဒါလဿနတဿ္နာ္အဃိတဂ့ၯ. ပွၯမီမဿဢ္တဂၯမ့ဿ္ထံဢ္နၯဒီး တဲနၯလဿ အမ့ဿ္ပွၯခရံာ္ဖိဘဢ္ဆဢ္ သ့ဢ္ညါလဿအ၀ဲသ့ဢ္ အတဿ္စူဿ္တဿ္နာ္ဘဢ္ဃးကစဿ္ယြၯ၊ ခရံာ္၊ ဒီးလံာ္ စီဆွံ တဖဢ္မ့ဿ္တဿ္လဿအလီၯဆီလိာ္အသးဒီးပွၯခရံာ္ဖိတက့ဿ္. လံာ္မးသဲ ၂၄း၁၁၊ ယ့ဢ္ရွဴးအနီဿ္ ကစဿ္ဒဢ္၀ဲစံး၀ဲ ၀ံအဘ် ဢ္ သရဢ္အဘ် ဢ္ကအိဢ္ထီဢ္၀ဲအါဂၯ ဒီးကဆွဿကမဢ္ပွၯအါဂၯလီၯ. မၯလိလံာ္စီဆွံ၊ ဃ့ထုကဖဢ္၊ ထီဢ္သရိာ္စိၯမိၯ၊ အန႔ဢ္မး နတဘဢ္တဿ္ဆွဿကမူၯကမဢ္နၯဘဢ္.

ဟံးန႔ဿ္အီၯလဿ www.karenkonnection.org အပူၯန႔ဢ္လီၯ.

0 comments:

Post a Comment