တဿ္လူဿ္ကပီၯယြၯဂ့ဿ္ပီညါခီလ့ဢ္ကႜိဖိတဖဢ္ ဃုာ္ဒီး ယၯ၊ လဿတဿ္တပာ္သူဢ္ပာ္သးအပူၯ ပလဲၯဘဢ္ ခဲဢ္ဖ့ဆူ ကီဿ္သူလ့ၯအပူၯန႔ဢ္လီၯ. တဿ္တပာ္သူဢ္ပာ္သးစံးတဿ္န႔ဢ္၊ အနီဿ္ကီဿ္န႔ဢ္ ပပာ္လီၯပသးလဿ ပကလဲၯဒဢ္ဆူ ထံဆဿကီဿ္ဆဿသ၀ီတဖဢ္ လဿကီဿ္ကႜီဢ္တဲဢ္အံၯအပူၯလီၯ. ဖဲန႔ဢ္သ့သ့ဘဢ္ဘဢ္ ကစဿ္ယြၯကတဲာ္ကတီၯ န႔ဿ္ပွၯတဿ္ ခီဖ်ိ သရဢ္အဲဢ္ကတဿဿ္ အတဿ္သုးတဿ္က်ဲၯအဃိ ပလဲၯယီဿ္လီၯဘဢ္ ကီဿ္သူလ့ၯ အဟီဢ္ခိဢ္ ဒီး ပအိဢ္ဘဢ္လဿအပူၯခံသီန႔ဢ္လီၯ.
ဖဲ ၁၅ သီအနံၯန႔ဢ္ ပစးထီဢ္ဟးထီဢ္လဿ ခ်ံးသူက်ိ ဒီးပလဲၯဆူ မီၯလံၯခႜါ ဒီးလဿမုဿ္နၯခီန႔ဢ္ ပဟးဆဿဂ့ၯ ဆဿ၀ါဘဢ္ ဟံဢ္တဖ်ဿဢ္ဘဢ္တဖ်ဿဢ္န႔ဢ္လီၯ. လဿခံတနံၯ ပလဲၯကဒီးဆူ လဿဿ္ဃီၯ ဒီးပမၯ၀ဲဒဢ္ခီစဿး ဖဲန႔ဢ္ တနၯန႔ဢ္လီၯ. လဿခံတနံၯပဟဲက့ၯဆူမီကဿ ဒီးပရ့လိာ္မုာ္လိာ္ပသး ဒီးမီကဿသ၀ီဖိတဖဢ္ လဿမုဿ္နၯခီ ခီဖ်ိ တဿ္ပႜး ခီစဿးန႔ဢ္လီၯ. တနံၯဃီန႔ဢ္ ပန႔ဿ္ဘဢ္ တဿ္ကစီဢ္ခီဖ်ိသရဢ္အဲဢ္ကတဿဿ္လဿ ပကဘဢ္လဲၯဆူ ကီဿ္ပူၯ လဿတဿ္လီဿ္ခံတီၯ လဿအမ့ဿ္ တၯအုးထဢ္ ဒီး ကြံလဿဿ္ဆႈဢ္ လဿတဿ္ကမၯလၯကပီၯခရံာ္အိဢ္ဖ်ဲဢ္ အဂီဿ္ န႔ဢ္လီၯ. တၯအုးထဢ္ဒီး ကြံလဿဿ္ဆႈဢ္န႔ဢ္ အိဢ္လဿ ဂီၯလ့ၯ ဒီး ဖလူ အဘဿဢ္စဿၯအဃိ ဖဲပနဿ္ဟူလဿ ပဘဢ္ လဲၯဆူတၯအုးထဢ္ ဒီးကြံလဿဿ္ဆႈဢ္န႔ဢ္ ပပ်ံၯတဿ္တစဲးတစဲးန႔ဢ္လီၯ. ဘဢ္ဆဢ္ လဿခံတဂီၯ ဖဲ ၁၈ သီအနံၯ န႔ဢ္ ပခီဂာ္ သူမြဲက်ိ ဒီး ပႏုာ္လီၯဆူ ကညီကီဿ္ပူၯန႔ဢ္လီၯ.
တခ်ဳးပႏုာ္လီၯကညီကီဿ္ပူၯအခါ ပသံကြဿ္သရဢ္အဲဢ္ကတဿဿ္လဿ ပမ့လဲၯန႔ဢ္ ပဘဢ္လဲၯစိာ္တဿ္မႏုၯလဲဢ္. အ၀ဲတဲပွၯ အဂ့ၯကတဿဿ္ လဲၯစိာ္ ထံးရွဴ တက့ဿ္. (မ့ဿ္လဿပလဲၯစိာ္ ထံးရွဴအဃိ ကဲထီဢ္တဿ္ဘ်ဳးတဿ္ဖွိဢ္ လဿပဂီဿ္ဖးဒိဢ္ညါလီၯ၊ ယကတဲအဂ့ဿ္လဿခံတစဲး). ပ၀ဲ လံာ္စီဆွံကႜိဖိဒီး ကႜိသရဢ္သရဢ္မုဢ္လဿ ပလဲၯသကိး တဿ္တဖဢ္ ခဲလဿာ္မ့ဿ္ ၂၇ ဂၯန႔ဢ္လီၯ. သရဢ္အဲဢ္ကတဿဿ္ ဆွဿပွၯဒီးအကါ တုၯလဿ မီၯလံၯခႜါ သူမြဲက်ိအနံၯ ၀ံၯပအိဢ္ခိးတဿ္တစိဿ္ဖိဒီး ဒဲနါ ကါတခိဢ္ဟဲတုၯ လဿကတီဢ္ပွၯလဿကလဲၯဆူ ကီဿ္ပူၯတဖဢ္အဂီဿ္လီၯ. ဖဲပလဲၯတုၯလဿသူမြဲက်ိနံၯအခါပထံဢ္ ပွၯသ၀ီဖိအါဂၯ အိဢ္ခိးပာ္စဿၯတဿ္ လဿကလဲၯမၯလၯကပီၯ ခရံာ္အိဢ္ဖ်ဲဢ္ လဿ တၯအုးထဢ္န႔ဢ္လီၯ. ဖဲဒဲနါ ဟဲတုၯအခါ နၯထီဢ္လဿကါခိဢ္ယၯထီဢ္လဿကါခိဢ္ ဃုာ္ဒီး တဿ္ဘိဢ္တဿ္စဿၯကတံာ္မးလီၯ. ပ၀ဲ ပွၯခဲၯဖ့ဖိအိဢ္ ၂၇ ဂၯဃုာ္ဒီးသ၀ီဖိတဖဢ္ ပဒိးထီဢ္ကါဒဲနါ၊ ပပွၯခဲလဿာ္ခဲ ဆ့လဿကါဒဲနါအပူၯ ကအိဢ္ အါန႔ဿ္ပွၯအဂၯလြံဆံ ညါလီၯ.
ပဒိးထီဢ္ကါဒဲနါ ဒီးပခီဂာ္ သူမြဲက်ိ ဒီး ပတုၯ၀ဲဒဢ္ဆူ သ့ဢ္ဘီဘိ လဿကညီကီဿ္ပူၯလီၯ. (ခဲဢ္ဖ့ဖိလဿ အလဲၯတဿ္ တဖဢ္အက်ါတနီၯ ကမ့ဿ္တဿ္အဆိကတဿဿ္တဘီ် လဿအ၀ဲသ့ဢ္အဂီဿ္ လဿအတုၯဘဢ္ဆူ ကီဿ္သူလ့ၯအပူၯ န႔ဢ္လီၯ.) ပလဲၯႏုာ္လီၯဆူကီဿ္သူလ့ၯပူၯ သီသီအခါ ကါက်ဲဂ့ၯ၊ ဘဢ္ဆဢ္ ကယီကယီ ကါက်ဲနးထီဢ္နးထီဢ္ ဒီးဖဲပလဲၯတုၯ က်ဲတ၀ာ္ (ဖဲန႔ဢ္ပလဲၯတဿ္လဿကါန႔ဢ္ကဘဢ္ တနဢ္ရံဢ္ဘ်ဲဢ္ဘ်ဲဢ္) အခါ ပထံဢ္လဿကါက်ဲဟးဂီၯအဃိ ပိာ္ခြါလဿအလဲၯတဿ္တဖဢ္ ယိးထီဢ္ ဘီဖ်း ဒီး ဘဢ္ဖ်း၀ဲဒဢ္ဟီဢ္ခိဢ္ ဒ္သိး ကါလဲၯ တဿ္ကသ့အဂီဿ္န႔ဢ္လီၯ. ဖ်းကါက်ဲ၀ံၯ ဒိးထီဢ္ကဒီးကါ ၊ လဲၯခီ ထံက်ိ လြံဿ္တီၯယဲဿ္တီၯ၊ လဿက်ဲ ၀ဢ္ဒ့တဖဢ္ ဖုဢ္မး၊ အဃိဘဢ္ကူးဘဢ္ကါတဿ္နးမးန႔ဢ္လီၯ. က်ဲတနီၯမးတလီၯဂာ္က့ၯလဿၯက်ဲဘဢ္. အိဢ္ထဲ တဿ္တပွီာ္လီၯ. (ယဆိကမိဢ္ မ့ဒိတဿ္ဂီၯမူဒ္သိး ဟီလံ၀ူး အတဿ္ဂီၯမူတနီၯလဿအဒိလဿ ပွဿ္က်ါတဖဢ္ ဖ်ါကဂ့ၯ မးလီၯ.) လီဿ္ခံကတဿဿ္ ဖဲ ၁၈ သီဟါလီၯခီန႔ဢ္ ပတုၯလဿတၯအုးထဢ္သ၀ီ ဒီးသ၀ီဖိတဖဢ္ တူဿ္လိာ္ ခီဢ္ဆဿပွၯဂ့ၯမးလီၯ.
ဒ္ယတဲတ့ဿ္လဿအပူၯကြံာ္အသိး တၯအုးထဢ္သ၀ီန႔ဢ္ အိဢ္လဿ ဂီၯလ့ၯဒီး ဖလူ အဘဿဢ္စဿၯ (ဂီၯလ့ၯတကပၯ န႔ဢ္တဿ္ဒုးကဲထီဢ္၊ ဒီးဖလူတကပၯစ့ဿ္ကီးတဿ္ဒုးကဲထီဢ္) အဃိ တၯအုးထဢ္သ၀ီဖိတဖဢ္ ဘဢ္အိဢ္လဿတဿ္ပ်ံၯတဿ္ဖုးအပူၯ ဒီးလဿတဿ္ပလီဿ္ပဒီသးအပူၯန႔ဢ္လီၯ. မ့အိဢ္လဿ တဿ္ပလီဿ္ပဒီသးပူၯ နာ္သက့ လဿတဿ္မၯလၯကပီၯခရံာ္အိဢ္ဖ်ဲဢ္အဂီဿ္ အ၀ဲသ့ဢ္တူဿ္လိာ္ခီဢ္ဆဿပွၯလဿတဿ္အီဢ္တဿ္အီဂ့ၯမး တုၯဒဢ္လဲာ္ပအီဢ္အါတလဿကြံာ္အခဿး ဒီးတဿ္ကီတဿ္ခဲအိဢ္ထီဢ္လဿ ပဟဿဖဿအဂီဿ္လီၯ. (ဖဲန႔ဢ္ ထံးရွဴအတဿ္ မၯဟဲပဿဿ္ထီဢ္၀ဲလီၯ.) တၯအုးထဢ္သ၀ီပူၯန႔ဢ္ ဟံဢ္ကိးဖ်ဿဢ္ဒဲးဃဢ္ဃဢ္ တဿ္ဟးလီဿ္တအိဢ္ဘဢ္အဃိ ပဘဢ္ဟးမၯတံၯမၯသကိးဒီး တဿ္ခဲက်ါန႔ဢ္လီၯ. သ၀ီဖိဖဲန႔ဢ္တဖဢ္ တစဿဃာ္ အထိးတဖဢ္ဘဢ္၊ မ့မ့ဿ္တခီ ပ်ဿ္၀ဲဒဢ္လဿတဿ္ခဲက်ါဒ္န႔ဢ္လီၯ. အဃိဖဲပလဲၯလဿတဿ္ခဲက်ါ လဿကမၯရွဲမၯလဲက့ၯပတဿ္ဂ့ဿ္တဿ္က်ိၯ တဘ်ီလဿ္လဿ္ ပဘဢ္ခိးကြဿ္မ့ဿ္ထီးကဟဲမၯတံၯမၯသကိးဒီး ပွၯဧါန႔ဢ္လီၯ.
ဖဲမုဿ္နၯခီပမၯတဿ္ရဲဢ္တဿ္က်ဲၯအဆဿကတီဿ္ ပထံဢ္ဘဢ္လဿ သ၀ီဖိတဖဢ္ဟဲကြဿ္တဿ္အါမးန႔ဢ္လီၯ. အ၀ဲအံၯ မ့ဿ္တဿ္လဿအမၯမုာ္ပသးဒိဢ္မးန႔ဢ္လီၯ. လဿခံတဂီၯ မ့ဿ္မုဿ္အိဢ္ဘွံးအနံၯအဃိ လဿဂီၯခီ ၇ နဢ္ရံဢ္ ပလဲၯထီဢ္ ဘါယြၯလဿသရိာ္ပူၯ ၀ံၯ၊ ဖုခဢ္ဆူ ကြဲပွၯဒီး ပလဲၯဆူ အသုးကလဿၯအပူၯ ဒီးပဘါသကိးယြၯဒီး အီၯန႔ဢ္လီၯ. (ဖဲဘါယြၯလဿသရိာ္ပူၯအခါ ပနဿ္ဟူစ့ဿ္ကီးက်ိသီဢ္လဿ ဂီၯလ့ၯတကပၯဒီး ဖလူတကပၯ န႔ဢ္လီၯ.) ၀ံၯ၊ ပဟဲက့ၯအီဢ္သကိးအီသကိး တဿ္ဒီးတစိဿ္ဖိ ပဟဲက့ၯကဒါက့ၯဆူ ကြံလဿဿ္ဆႈဢ္ လဿကမၯလၯကပီၯ ခရံာ္အိဢ္ဖ်ဲဢ္ဖဲန႔ဢ္ အဂီဿ္န႔ဢ္လီၯ. (တၯအုးထဢ္ဒီးကြံလဿဿ္ဆႈဢ္န႔ဢ္ လဿခီဢ္ပဟးဘဢ္ တခီနဢ္ရံဢ္က်ဲအဃိ ယၯဒီး ပွၯကႜိဖိ လြံဿ္ဂၯ ပဟဲက့ၯလဿခီဢ္န႔ဢ္လီၯ.) ပဟဲက့ၯတုၯ ကြံလဿဿ္ဆႈဢ္တစိဿ္ဖိ ဒီး ပလဲၯဆူသရိာ္ ဒ္သိး ပကရ့လိာ္မုာ္လိာ္သးဒီး သ၀ီဖိတဖဢ္လဿ မုဿ္ထူဢ္တဿ္ဘါအဂီဿ္န႔ဢ္လီၯ. ၀ံၯဒီးပအိဢ္ဒီး တဿ္ရ့လိာ္မုာ္လိာ္ ဘူဢ္စီဆွံန႔ဢ္လီၯ. ဒီးနၯအ၀ဲန႔ဢ္ ပမၯလၯကပီၯခရံာ္အိဢ္ဖ်ဲဢ္အမူးလဿ ကြံလဿဿ္ဆႈဢ္အပူၯန႔ဢ္လီၯ.
လဿခံတနံၯလဿမုဿ္နံၯပူၯတသီ (၂၀ သီ) သရဢ္အဲဢ္ကတဿဿ္ စံးလဿကဟဲက့ၯမၯအီဢ္ညဢ္အဃိ ပပာ္တ့ဿ္ ပတဿ္ဘိဢ္တဿ္စွဿၯ ဃုာ္ဒီးကႜိဖိစွၯဂၯ၊ (ဒ္သိးကဟဲက့ၯတီတဿ္ဖိတဿ္လံၯလဿကါအဂီဿ္)၊ မ့မ့ဿ္ပွၯအါဂၯ တခီ ဟဲက့ၯဒီးအခီဢ္န႔ဢ္လီၯ. ပစးထီဢ္ဟဲက့ၯလဿ ဂီၯခီ ၉ နဢ္ရံဢ္ ၊ ပဟဲက့ၯတဆီဘဢ္တဆီ ပအိဢ္ပတုာ္ လဿကြံ စွၯဖ်ဿဢ္ဒ္သိးကမၯညဢ္အဂီဿ္ဘဢ္ဆဢ္ ညဢ္တန႔ဿ္နီတဘ့ဢ္ဘဢ္. အဃိ ပဘဢ္ဟဲက့ၯကလီဒ္န႔ဢ္လီၯ. (ကိညဢ္လဿပဘဢ္ဟဲက့ၯကလီ၊ ပမ့ဟဲက့ၯ၀ံဒဿၯညဢ္ဒု တမ့ဿ္လဿယဟဲက့ၯလဿၯခီဢ္ကတုၯလဿၯဘဢ္.) ပဟဲက့ၯလဿက်ဲ ပဘဢ္ဟဲက့ၯခီဂာ္ ထံက်ိ လြံဿ္တီၯယဲဿ္တီၯ၊ တုၯလဿခံကိဿ္၊ ခီဢ္ကံဢ္ဒုဢ္ဘ်ဳးမတၯဘ်ဳး ၊ ဘဢ္ဟဲက့ၯက့ၯကယီကယီ၊ တဿ္ကိဿ္ဆါနးမး အဃိ၊ ဖဲ မုဿ္ဃ့ဿ္လီၯခံနဢ္ရံဢ္မး ပဟဲက့ၯတုၯလဿ သ့ဢ္ဘီဘိ သ၀ီ ဒီးပခီလီၯ သူမြဲက်ိ ဒီးပႏုာ္လီၯဆူ မီၯလံၯခႜါသ၀ီအပူၯန႔ဢ္လီၯ. ဖဲန႔ဢ္အခါ ယမဲာ္သဢ္လဿအ၀ါန႔ဢ္ထီဢ္သူ ဒ္သိးကိၯလၯသူ၊ ယဘဢ္ယိဢ္မးလဿ ယတဿ္အဲဢ္တီကြဿ္နီဢ္ယၯတဘဢ္လဿၯဘဢ္ခီ၊ ဟဲး..ဟဲး...
ပဟဲက့ၯတုၯကဒါက့ၯဆူ ကီဿ္ကႜီဢ္တဲဢ္ပူၯဂ့ၯဂ့ၯဘဢ္ဘဢ္၊ ဒီးတနၯဃီန႔ဢ္ ပဘဢ္လဲၯဒီးဆူ၀့နးနး သ၀ီလဿ တဿ္မၯခီစဿးအဂီဿ္န႔ဢ္လီၯ. ဒီးလဿခံတနံၯ ဖဲ ၂၁ သီအနံၯန႔ဢ္ ပဟဲက့ၯကဒါက့ၯဆူ ခ်ံးသူက်ိလဿ ပတဿ္အိဢ္ တဿ္ဆိးအလီဿ္န႔ဢ္လီၯ. တဿ္သးမုာ္အဒိဢ္ကတဿဿ္ လဿယဂီဿ္ လဿယတဿ္လဲၯဟးဆူ တၯအုးထဢ္ဒီး ကြံလဿဿ္ဆႈဢ္သ၀ီန႔ဢ္မ့ဿ္၀ဲ ဖဲယထံဢ္ဘဢ္ KNLA အသုးဒီး DKBA သုးတဖဢ္ ဟးတပူၯဃီအိဢ္တပူၯဃီ န႔ဢ္လီၯ. ယဆဿလဿ ဒီပုဿ္၀ဲဿ္လဿအဖးဘဢ္ တဿ္ကြဲးအံၯတဂၯလဿ္လဿ ကသ့ဢ္နီဢ္ တၯအုးထဢ္ ဒီး ကြံလဿဿ္ဆႈဢ္သ၀ီဖိတဖဢ္လဿ သုတဿ္ထုကဖဢ္အပူၯတက့ဿ္.
မ္ယြၯဆိဢ္ဂ့ၯပွၯဖးလံာ္ဖိကိးဂၯဒဲးတက့ဿ္....
0 comments:
Post a Comment